禍不單行

當以為電話事件已成過去，點至又到另一樣野發生，剛過的星期日，中午食完飯後，隻右膝無啦啦好鬼痛，痛到行路都行得好辛苦，想去睇相熟的跌打醫師，點知他剛剛收工，沒辦法，唯有去留下的跌打館睇，

點至．．．．咁都比我．．．遇著ｓａｌｅｓ醫師．．．．


＊＊＊

＊＊＊

＊＊＊

入到去，話想睇跌打，例牌問下你邊到痛，點整到，講完一輪，佢就用兩塊貼電下隻腳，之後就開始推銷產品～

醫師：你一定係搽過藥油啦！
小弟：係呀！咁之前痛咪搽ｌａｗ。

醫師：你知唔知ｄ藥油有毒呀！正骨水有哥羅芳，其他藥油都好毒，
　　　連奔機係外國都醫死過人。（唔知係咪真）

小弟：咁誇張，但無乜聽過咁既報導既。

醫師：（不理我問題）你個膝頭咪搽左油，而家咪發出來，腫左ｌａｗ。
小弟：下．．．．．（跟著遞了兩張單張比我）

醫師：嗱！新聞都有報過話扭親，唔可卒佢，唔係會越卒越差。

小弟：這個我都聽過。

醫師：所以我都唔會同你搽油或卒佢．．．你而家應該係拉親外印帶，
　　　（吓，齋望，掂都沒有掂過我個膝頭就知，唔通係神醫）
　　　嗱！你這個傷要敷八劑藥才會好。（神醫啊）

小弟：吓！我傷得咁重！（你吹我都同你吹下先！）

醫師：放心！而家金融海嘯，我唔會收你咁貴既！你做邊行呀？有無買保險？
小弟：文員ｌａｗ，保險有買掛！

醫師：有保險就得啦！嗱！你返去睇下你保險可以ｃｌａｉｍ到幾多，
　　　我既收據會就番你，你想分幾多張都得。最重要係你可以ｃｌａｉｍ得
　　　番全部錢。（咁都得．．．）

小弟：嘩！好似幾好喎！

醫師：另外，我這裡係首創《自己換藥方法的（指著其中一單張介紹）》，
　　　其他跌打，又幫你卒，又幫你包又成，所以收你百幾二百，
　　　我這自己換藥方法，每劑都是一百，我第一次教你點換，
　　　之後每日晚上十點自己敷，早上七點除左佢就得，方便快捷！
　　　 嗱！你睇，我之前收恒生員工，佢醫療保險，我都收佢百三，
　　　而家我收一百，真係好低啦！

之後佢從藥柜，取了八劑藥（我心知不妙），七劑放入外賣盒中，一劑作準備。我都當場有點呆，即刻問他

小弟：而，要一次過買晒八劑的嗎？

醫師：係呀！要買晒八劑呀，自己換藥，你要敷晒成個療程才會好啊！

小弟：下．．．可唔可以試著一劑先呀？

醫師：唔得，點可以咁，個個都試下，點得呀！放心喎！
　　　你睇下我係幾多大公司的的註冊醫師（手指旁邊的膠板），我唔掂，
　　　都唔會有咁多公司用我啦！

小弟：唔．．．都係比我諗下先，不如比我試一劑，明天再黎睇你啦！

醫師：（少少發難渣）試就無謂啦！你自己諗下啦！你個傷都唔輕，
　　　八劑一定要！你回去再諗清楚再返來睇啦！
　　　（跟手用最快速度取走電緊的貼）

小弟：咁我諗下先啦！（轉身走人）

醫師：邊有跌打有得試，你慢慢諗清楚啦！

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

我無懷疑佢既醫人技術，但佢ｈａｒｄ　ｓｅｌｌ，我真係頂唔順，可能佢ｄ藥真係得，但無可能齋望就知我係乜傷，我自己都有大大話話廿幾年的睇跌打經驗，還要我一次過比八舊水你，真係好難說服我姐！

最後，慢慢行番屋企，試下搽姑婆借給我的藥油，跟著又自己拿番個ｏｔｏ電腳出來電下，經過一晚的自己治療，第二朝起身隻腳真的鬆了，沒咁痛。不過都係穩陣ｄ，請假去睇下跌打，這個相熟跌打檢查完，話由於膝還有腫，要敷一劑，等它消腫檢查多次，才知乜事，第二晚再睇，原來是骨膜發炎，敷埋今劑應沒問題，現在已好番好多，起碼行路都不痛！

我真係好想再去同亞ｓａｌｅ醫師講．．．人地兩劑攪掂啦！唔駛八劑呀！