幼兒潛能訓練課程(五)

來到第五堂，原本上堂有進步的樂仔又打回原形，因為沒有足夠的午睡（只睡了半個鐘多少少），成個人暴躁晒，扭計非常．．．一唔如意就用頭撞人或大叫，所以開頭的活動，樂仔都唔係太多參與，到後面好動的活動，樂仔才能投入。

第五堂活動內容：

１）每堂都要唱的歡迎歌等等．．．
～～樂仔有歌聽，總算安靜。

２）傳波仔：目的讓小朋友明白分享，分享是開心，一齊玩的。
～～發脾四中，差不多沒參與過。
　　
３）夾衫仔：要小朋友嘗試用衫夾夾物件，訓練手指，有助將來執筆的手姿。
～～始終未能掌握用手指去打開衫夾，有待練習。

４）爬隧道：有一條幾長的隧道比小朋友爬過去。
～～有些小朋友唔夠膽爬，但這是樂仔強項，第一個爬，還不知爬了幾多轉。

５）跨障礙：導師設置由矮到高的欄，要小朋友自己跨過去，家長在傍輔助。
～～樂仔頭兩個矮的都可以自己誇過，但高的要人扶過肯過。

＜這是另一首每堂都要唱的歌仔：十隻小手指和小腳指＞

小總結：
如果樂仔唔係唔夠睡，沒咁扭計，應該會投入些，但沒計，小朋友一個扭眼瞓，一個扭食奶，真係死穴，下次都係要比佢早點午睡才得。至於課堂內容，有動有靜，都算多元化，不錯！

每次和樂仔上堂，感覺樂仔總比其他小朋友活躍，一點停下來的時候都沒有，真係唔知當佢精靈定係奀皮好．．．有點擔心是過渡活躍．．．

最後，自已好同意倩寧爸在他ｂｌｏｇ所講的問題：
這課程一早講明只可以在第一堂和最後一堂拍照，之前第二三堂都有一兩個父母拿相機拍照，但不是太張揚，其他家長不知是否見到別的拍照沒有人指責，今堂多了很多家長也在上堂中拍照，有時還阻礙到其他家長上堂，真的唔係太好，希望那些家長真的可以自律一點，當是做一個守規矩的榜樣給孩子看。

上完堂，約了十多年的老朋友在家小聚一番，順道和其中一位老友慶祝生日。
這天好開心，除了能見到兩位大肚婆外，我地還講下以前大家一同去旅行的笑事，還即興拿回照片才看，當然，一班ｃ９點可以唔講下生仔經。
說說笑笑的時間真係過得快，傾到成２點，真係唔係幾好意思，要兩位大肚婆咁夜睡，不過而家咁難得才聚到一次，一次半次，唔會介意掛！