面試

星期六，樂仔有兩間幼稚園的學前班要面試，一間上午，一間下午，由於老婆要返工，所以只有我單拖帶樂仔去上午的幼稚園面試，我地和老婆一齊出門口，所以還有時間和樂仔去歎個早餐，之後再慢慢行去幼稚園，去到時，大早了，還未開始，樂仔係門口玩下車車，不知幾鬼開心，之後入去準備面試，未開始前，這學校先講解他們的教學理念，但我只得一個人，所以先留下樂仔在玩具室，比導師睇住，自己一個去聽，聽過後，這學校真理念都真係不錯。之後去接樂仔時，導師話：這個你個仔呀，佢都好活躍，好肉緊喎！可能樂仔太百厭了．．．
之後被叫名入去面試，首先導師同樂仔傾下計，可惜樂仔唔多蘇人，之後比個箱樂仔入錢，樂仔好開心咁，一個一個咁入，直到入滿為止，之後玩另一個玩具，這個玩具成日都見到，之前係上幼潛班時，樂仔都成日玩，所以無問題，之後導師話可以出去取禮物，想取回樂仔手上的玩具時，樂仔發了脾氣大叫，幸好我話玩多一次時，佢又肯放底，比我和導師一齊拖佢出去取禮物，之後影埋相，走得，咁就見完就一間的幼稚園。

至於樂仔的表現，都算不錯了，都知樂仔講野這方面係差ｄ，沒法啦！我和老婆都幾鐘意這間學校，可惜收到風這天有百幾個學生來面試，只會收４０個，睇黎樂仔考到的機會唔係太大．．．．

到了下午，去了另一間面試，這間其實我們唔係太鐘意，但驚上午的那間不收的時候，樂仔無得讀學前班，所以報多一間安全ｄ，不過面試後，對這間的幼稚園的印象真係麻麻，無論環境，導師，校長等，都感覺不好，到時真係收了樂仔，都唔知比唔比佢讀好。

後記：其實自己從來無諗過樂仔要讀什麼明校，所以由始自終都係諗著係番藍田讀，方便錢太接佢，但無奈這一兩年太多ｂｂ出世，攪到要爭位，我最怕係無得讀姐，因為我地都想佢早點習慣返學的生活，學守規矩，希望早上的那間收佢啦！