新工的一週（踏上黑仔之路）

話咁快就返左工一個星期，習不習慣，講真，真係好唔習慣！

返工返遠左，要早起半個鐘，每朝都好似行屍酒肉咁．．．所以都唔敢夜瞓，但不知何解每日都好似好累咁，真係企起到都睇得著！

食飯食貴左，沒法，新黎步到，唔通成日自己食咩，都要跟下大圍食，但可能佢地係高層人士，食ｄ野比較貴，平時的我一定唔會食得咁貴，咁樣落去唔係辦法，食ｌｕｎｃｈ都食窮我啦！下個禮拜都係要找兩三日扮有事，自己去找平野食先得。

車費貴左，為左慳ｄ，而家每朝都會行遠多少少（５分鐘到），去拍回程搭地鐵平＄２，真係慳得一蚊得一蚊！

以上其實決定轉工時都已預左，所以唔習慣都要頂硬上，鬼叫你窮呀！頂硬上！
講到最唔習慣，應該係工作環境，以前舊公司坐最後，得閒上網都無人睇到，而家坐頭位，真係好鬼開揚，想偷雞上網，真係唔夠膽，有時上偷偷去探下你地，都唔得，想輕鬆一下都唔得！唉．．．．

以前有兩個同事幫手，而家來到新公司，做最低（亞四）一個，真係乜都要做，公司ｄ數又係亂過鬼，相信未來一兩個月，都係要執番以前ｄ數都似。都好既，大把野做，好過係度無野做坐係到扮做野，重幸苦！

這個禮拜，最辛苦既地方，都相信係我個鼻啦！可能係鼻敏感的關係，這星期一返埋位，又不停咁流鼻水，鼻塞塞咁，真係好辛苦！唔知係間房問題，定係個冷氣出風位對著我既問題，重至我一離開個坐，去廁所或食ｌｕｎｃｈ，都會好番好多，唔通個位係三煞位？

至於同事，都算不錯，幾位大哥大姐都好ｎｉｃｅ，氣氛都不錯！反而做得最耐的ｃａｓｉｅｒ，就係最無禮貌的一位，千祈唔好問佢野，佢每次都唔會望著你回答你，而答案，永遠是簡而精．．．．

我：唔該幫我開兩張票呀？
ｃ正左上網睇新聞，沒有轉身望我，就大聲地回答：放低．．．．．
我：．．＠＃＄！．．ｘｚｙ（心諗）

我：唔該幫我ｃｈｅｃｋ下這兩單ａｕｔｏｐａｙ係乜數？
ｃ在寫緊野，沒有抬頭地回答：轉頭覆．．．
我：．．．．．．．．

唔通做親ｃａｓｉｅｒ都係咁既．．有乜串串癮！我諗一排才能習慣這種同事之間的態度！

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

最近，小弟踏上黑仔之路，今星期真係諸事不順外，今日．．．．還唔見到個手提電話，這電話只買了三個月，咁就唔見左，真係好肉痛！明明自己放得好好，放係外套的暗格位，無理由會跌左，諗左好耐，都唔知係邊到唔見，真係激死我！．．．好想殺人呀～～～～～