拜仁 上半季回顧

完成半季，德甲班霸只能排第五，相差第一位的多蒙特１４分之多，相信沒有一位拜仁球迷會收貨，特別上半季的作客成績，２勝３和３負的成績，共失了１５之多，實在不能接收。

（自大狂，你清醒未呀！）


回想季初，收回借將郤高斯和般奴後，雲膠耳這個自大狂說不會增兵時，我真係呆了，上季有眼珠既人都睇得出拜仁迪米炸彈＋雲布大雪柜的後防組合，真係比唔到人信心，唔係上季湯馬斯梅拿的起飛，洛賓的超表現，我相信拜仁不會有兩冠一亞的好成績。

（半季差勁的表現後，雲布廷真的變了雪柜，雪凍緊）

（迪迷捷尼斯，最終都要離開拜仁，轉戰西甲馬拉加）


果然，季初，拜仁就遇到一個大題目，傷兵！洛賓參加完世杯，重傷半季，上季表現出色，勤力王奧歷宣布報銷，今季玩完。列貝利又一傷再傷，打極都打唔番最住狀態！

（刀疤佬，你幾時才回覆你第一季加盟的狀態呀？）

（洛賓，你又番做玻璃人？！快Ｄ復出，下半季靠你啦！）

（奧歷，你有無希望提早復出呀？）


至於雲膠耳，佢用人，和用陣問題上，由上季開始已經好有問題，高路斯好明顯唔啱拜仁的陣式，所以攪到今季還未開齋，高路斯一直都入到波，至於迪莫斯卓重慘，無論打得好唔好，永遠都只是雲膠耳愛將雲布美的後備，真的無野好講！

（雲隊長，好大機會打埋今季會走人！ＬＩＫＥ！）

（百思不得其解，高路斯在國家隊表現，永遠同拜仁陣中，相差三班）


經過季初一大輪的低潮後，傷兵也陸續傷好，加上雲膠耳在無人用之下，終於肯比機會迪莫斯卓和高美斯，兩人亦打出身價。迪莫斯卓這個雷霆救兵，打防中出色之外，估不到客串中堅都有不錯表現。而高美斯在多場正選後，亦開始擺脫三千萬先生的壓力，表現番在史特加是的超級馬里奧水準，狂入波，令到拜仁的戰績亦重上軌道，最後以第五名完成上半季的賽程，爭第一無望，但起碼還有機會爭頭三名，都算不幸之中的大幸了。

（我始於覺得，迪莫斯卓拍小豬係中路最佳選擇。）

（打單箭頭，出高美斯，點都好過高路斯。）


雖然我自己對雲膠耳用人和排陣唔多滿意，但佢都有我值得欣賞的地方，就係敢用年青人的政策，上季的梅拿和巴斯度巴，今季的干旦度和郤奧斯，都是肯用年青人的得益者，希望他們越來越成熟，他們的成長，絕對是拜仁之福。
最近，新的得益者就是後生龍門卡夫特，因為雲膠耳已宣佈，下半季開始，卡夫特會是拜仁的的一號門將，希望佢真的能把握這次機會，證明自己的實力。

（湯馬任梅拿，給了拜仁久遺了的活力。）

（越打越成熟，比多點機會他，絕對是好事，不過是打中堅，不是左閘）

（我心目中的正選左閘，但最後傳聞說會賣走佢，唔好呀！）

（進攻中場這位置，才是郤奧斯的最佳位置。）

（卡夫特，上不上到位，睇你自己啦！唔係下季應該見到紐亞加盟了。）


在休冬期間，都有好消息，就係隊中兩個老臣子，拿姆和小豬都肯長期效忠拜仁，簽下一張長約給球隊！ＧＯＯＤ　ＮＥＷ！

（拿姆今季是副隊長，睇黎下季雲隊長走埋，你應該有得上位做大隊長啦）

（小豬在拜仁的位置和地位，越來越似當年的波歷克了）
一月份，轉會市場重開，第一筆收購是１７００萬歐元的後場多面手，巴西人古斯達禾，此子打防中不錯，活力十足，起碼比起雲隊長多十萬八千倍，至於中堅問題？究竟會不會買呢？過左半個月了，但好似無乜消息，唔通真係唔買，真係想靠當年用成千萬歐元的般奴？我自己覺得這般奴都唔算好差既，但未算是頂級後衛，間中都有蝦碌出現，靠佢，真的唔係好穩陣。
如果比我選，我會去搶購雲達的梅迪殺卡，一來價錢都係一千萬磅，不算好貴，二來佢已在德甲成名，不用再要適應德甲問題，可以即食。

（１７００萬歐元，價錢不平，拜仁會不會又入錯貨呢？）

（般奴，睇黎下半季後防都係靠你了，唔該你醒醒定定啦！）


展望下半季，要奪冠，真係難過登天，要多蒙特失分準，又要自己生生性性，實在難上加難，不如實實際際點，力爭頭三名，有得打歐冠好過。


小弟心目中，上半季拜仁的最佳陣容：

畢特（ＧＫ）

拿姆（ＤＲ），巴斯度巴（ＤＣ），般奴（ＤＣ），干旦度（ＤＬ）

小豬（ＤＭＣ），迪莫斯卓（ＤＭＣ）

列貝利（ＡＭＬ），郤奧斯（ＡＭＣ），梅拿（ＡＭＲ）

高美斯（ＣＦ）

＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊

又一篇超多字的趕客足球誌，唔啱睇，敬請原諒啊！